ՀՕՖ-ի «Մարդիգյան» երեխաների պաշտպանության կենտրոնը յուրաքանչյուր տարի տրամադրում է թերապևտիկ ծառայություններ  կյանքի դժվարին իրավիճակներում հայտնված ավելի քան 160 երեխայի և նրանց ընտանիքներին, այդ թվում՝ հաշմանդամություն ունեցող անձանց։ Սակայն Բերդ քաղաքում բացակայում են կառույցները, որոնք լիարժեք հարմարեցված կլինեն  ֆիզիկական, տեսողական, լսողական և այլ խնդիրներ ունեցող անձանց ծառայություններ մատուցելու համար։ Արդյունքում նրանք ստիպված են համայնքից դուրս ստանալ անհրաժեշտ օգնություն, ինչը հսկայական ծանրություն է հատկապես սահմանամերձ գոտում ապրող խոցելի այս ընտանիքների համար:

Ուստի, Հայ օգնության Ֆոնդի ԱՅՈ հարթակը, խորապես գիտակցելով այս խնդրի հրատապությունը, պարտավորվում է ստեղծել բարեկարգ, անվտանգ և հարմարավետ միջավայր:

Հավաքագրված գումարով տեղադրվելու են ռամպաներ, ավտոմատ դռներ, ներդրվելու է խելացի նավիգացիոն համակարգեր, ինչպես նաև հարմարեցվելու են  սպասարկման բոլոր տարածքները։ Այս փոփոխությունները թույլ կտան հաշմանդամություն ունեցող յուրաքանչյուր անձի հեշտությամբ և ինքնուրույն օգտվել ծառայություններից` ապահովելով նրանց արժանապատիվ և լիարժեք մասնակցությունը հասարակական կյանքին։