Բժշկական տրանսպորտ

Հայաստանի Սյունիքի մարզի տարածաշրջաններից մեկի 1740 գյուղաբնակներին բժշկական օգնություն ցուցաբերելու համար պատասխանատու է միակ` հերոս բժշկուհի Անուշը։ Երբ նա ընդամենը 30 տարեկան էր ու փոքր որդու հետ Երևանում էր բնակվում, տեղեկացավ Դարբասի նման գյուղական համայնքների ծանր վիճակի մասին: Այն ժամանակ գյուղում ստացիոնար աշխատող բժիշկ ՉԿԱՐ։ Անուշը հրաժարվեց իր հարմարավետ կյանքից և կարիերայից՝ այսօրվա հերոսը դառնալով։ 

Նա բախվեց բազմաթիվ մարտահրավերների՝ ծառայելով այս համայնքներին, բայց դրանց բնակիչներն իր ընտանիքը դարձան։ Մեր մայր կազմակերպությունը` «Հայ օգնության ֆոնդը», անում է հնարավորը նրան աջակցելու համար: 2022 թվականին մենք միջոցներ ենք հավաքագրել` բուժկետում ջեռուցման համակարգ տեղադրելու նպատակով։ 

Վերջերս տեղեկացանք, որ տրանսպորտը նույնպես մեծ խնդիր է։ Բժիշկ Անուշի համար կարևոր է կանոնավոր այցելություններ կատարել իր խնամքի տակ գտնվող գյուղեր՝ խորհրդատվության, իրազեկման ծրագրերի և բուժման նպատակով: Նա և մի քանի բուժքույր սպասարկում են ոչ միայն Դարբաս, այլև Գետաթաղ, Լոր, Շենաթաղ, Լծեն և Շամբ գյուղերի բնակչությանը։ Մինչդեռ բուժկետը մեքենա չունի, և բժիշկ Անուշը հույսը դնում է պատահական մեքենաների վրա, որպեսզի հասնի այնտեղ, որտեղ անհրաժեշտ է։  

Այս այցելությունները բարդ են նաև աշխարհագրական բարդ պայմանների պատճառով, ու անբարենպաստ եղանակային պայմաններում ճանապարհները գրեթե անանցանելի են  դառնում: Այնուամենայնիվ, այցերը կարևոր նշանակություն ունեն առողջական խնդիրների վաղ հայտնաբերման և կանխարգելման համար։

Բարձրորակ ամենագնաց մեքենան զգալիորեն կբարելավի իրավիճակը՝ դարձնելով այս այցելությունները ավելի իրագործելի՝ հնարավորություն տալով բժիշկ Անուշին ավելի արդյունավետ պլանավորել իր ժամանակը: Կանոնավոր այցելությունները թույլ կտան արդյունավետորեն իրազեկել բնակչությանը, վաղաժամ հայտնաբերել հիվանդությունները, կանխարգելել դրանք, ինչպես նաև կառավարել քրոնիկ հիվանդությունները: Սա, իր հերթին, կօգնի նվազեցնել հիվանդացությունը և մահացությունը համայնքում: