Հավասար կրթություն բոլորի համար

Հայ Օգնության Ֆոնդը  (FAR) Ուսուցման դժվարություններ ունեցող երեխաների կենտրոնի երկարամյա գործընկերն է։ Այն պետական կառույց է , որը աջակցում է 3–18 տարեկան երեխաներին, որոնք ունեն հատուկ կրթական պայմանների կարիք։ Կենտրոնը միաժամանակ հանդես է գալիս որպես բարդ դեպքերի անմիջական ծառայություններ մատուցող և որպես մեթոդաբանական կենտրոն՝ համակարգելով Հայաստանի 24 մարզային մասնաճյուղերի աշխատանքը։

Ամեն տարի շուրջ 100 երեխա ՀՄԿ—ում անցնում է համապարփակ, բազմամասնագիտական գնահատում, որին հաջորդում են անհատական միջամտության ծրագրեր՝ ներառելով խոսքային, հոգեբանական և սենսորային թերապիաներ։ Կենտրոնը նաև մշակել է նորարարական և ներառական մոտեցումներ՝ արվեստի, կավագործության, թատրոնի և երաժշտության միջոցով իրականացվող թերապիաներ, որոնք նպաստում են հաղորդակցման հմտությունների զարգացմանը, հուզական ինքնարտահայտմանը և ինքնավստահության բարձրացմանը՝ ներգրավելով նաև ընտանիքի անդամներին և հասակակիցներին։

Այնուամենայնիվ, մի շարք թերապևտիկ սենյակներ գտնվում են վատ վիճակում և հարմար չեն արդյունավետ թերապևտիկ աշխատանքի համար։ Երաժշտական թերապիան ներկայումս հնարավոր չէ սկսել՝ համապատասխան տարածքի բացակայության պատճառով, թեև կենտրոնն ունի թե՛ մասնագետ, թե՛ անհրաժեշտ գործիքներ։ Ծրագրի շրջանակում նախատեսվում է վերանորոգել չորս թերապևտիկ սենյակ՝ արվեստի, կավագործության, երաժշտության և օժանդակ տեխնոլոգիաների, որպեսզի ստեղծվի անվտանգ, գործնական և ջերմ միջավայր հաշմանդամություն ունեցող երեխաների համար։